ភ្នំពេញ៖ ប្រធានព្រឹទ្ធសភា សម្ដេចតេជោ ហ៊ុន សែន បានបង្ហាញការភ្ញាក់ផ្អើលនិងសប្បាយរីករាយយ៉ាងខ្លាំងដោយបានទទួលដំណឹងថាមូលនិធិអភិវឌ្ឍន៍ហេដ្ឋារចនាសម្ព័ន្ធតាមព្រំដែនដោយផ្តោតលើផ្លូវថ្នល់ត្រូវបានចូលរួមដោយប្រជាជននៅតាមមូលដ្ឋាន។
សម្ដេចបានសរសេរនៅបណ្ដាញសង្គមរបស់សម្ដេចនៅយប់ថ្ងៃទី២៨ ខែសីហា ឆ្នាំ២០២៤នេះ ដោយចាត់ទុកនេះជា«ចលនាជាតិដ៏មហិមាក្នុងការស្រឡាញ់ជាតិស្រឡាញ់ទឹកដីរបស់ប្រជាជនយើងដែលជាខឿនការពារជាតិដ៏រឹងមាំរបស់ប្រជាជនដែលខ្លាំងជាងអ្វីៗទាំងអស់»។
សម្ដេចបានកោតសរសើរដល់ទឹកចិត្តរបស់ពលរដ្ឋនៅភូមិត្រពាំងចក ភូមិគ្រាំងគរ ភូមិកែស ភូមិគល់គម ភូមិអង្ករនាប ភូមិថ្មកែវ ភូមិត្រពាំងឬស្សី ឃុំត្រាំកក់ ស្រុកត្រាំកក់ខេត្តតាកែវ ដែលបានចូលជាថវិកា មាន៣០០ ៥០០រៀល ១០០០រៀល ២០០០រៀល ៥០០០រៀល ១០០០០រៀល ២០០០០រៀល តាមលទ្ធភាពរបស់ពួកគេ ដែលសម្ដេចថាជាការបង្ហាញនូវទឹកចិត្តស្នេហាជាតិ «របស់ប្រជាជនយើងដែលម្ចាស់ប្រទេស»។
សម្ដេចតេជោសង្ឃឹមថានាយករដ្ឋមន្រី្ត សម្ដេចធិបតី ហ៊ុន ម៉ាណែតនឹងជូនលិខិតថ្លែងអំណរគុណជូនគ្រប់បងប្អូនដែលបានបរិច្ចាគរាប់តាំងពី១០០រៀលឡើងទៅដើម្បីពលរដ្ឋដែលបានចូលរួមទាំងរក្សាទុកសម្រាប់តកូនតចៅអំពីស្មារតីស្នេហាជាតិរបស់ឪពុកម្តាយជីដូនជីតា៕
